ang plataporma sa estasyon sa tren

mao kunoy kinanindotang dapit sa kalibotan
(nga kaniadto di gyod nako masabtan)
kay mao niy dapit nga kanunayng saksi sa
di matagik nga sugilanon, sa mga balak
nga hangtod karon nagpangita pa sa iyang
manggagaray. dili gyod maletra kay kanunayng
lumsan sa hinagunlos sa kalisod sa
pagbating gilukoban sa way buot nga
panamilit. ug ambot unsa ni katinuod.

pila na ka tuig ron nga may amerikanong
nagsigeg inom dinhi samtang naglantaw
sa bungtod nga mora kunog puting elepanteng
naglubog, samtang ang tambok nga silbidora
nga kalkag og buhok nagpasalipod sa nipis
nga kurtina.

mokuyog ba o dili ang babaye?

kinsa kadtong lalaki?

ug nganong wa man sila
mosakay sa tren?

di kaha to sila mga buang
nga parehong nasaag pagpangita
sa nawala nilang dulaan?

pareho nato rong duha god nga nia:
ikaw manamilit na sad ug ako maglantaw
sa mga bungtod nga nagsigeg lumpayat
morag kabayong gibuhian
sa kuwadra.


-- OMAR KHALID
Medellin, Cebu, Philippines