aninipot sa lasang

Matod pa sa akong maestra
ang aninipot inig mangitag asawa
motugdon kini siya sa dahon
samtang maghulat sa kilomkilum
ang iyang taas nga sungay
modayon ug kiaykiay
ug siya maglakawlakaw
mourong, pagkahuman mabanhaw
molupad siya sa kahanginan
kuyog sa uban nga ginsakpan
magkidlapkidlap ang ilang mga lubot
aron ang mga babaye mahimuot
ug dala ang ilang mga lampara
mosayaw sila kuyog sa sonata
makigdulog sa kang bisan kinsa
nga modawat sa ilang harana.

Wala gyod diay silay kalainan
sa mga kalalakin-an--
kining mga aninipot sa lasang
nga sakop sa pamilya sa kagang.


-- MARIA VICTORIA BELTRAN

Cebu City, Philippines