usa ka gabii sa Escanaba

…empty as a pocket…
-- gikan sa awit ni Paul Simon

Usa ka gabii, miadto kami
aron pagpanugal
didto sa Escanaba.
Usa ka gamayng lungsod
duol sa daplin sa Lake Michigan
niadtong amihanang lugar
nga gitawag og UP (Upper Peninsula).

Ang mga ugat sa kadalanan
nga among giagian
ngitngit ug way mga suga
ug ang way-dahong mga sanga
sa kakahoyan sa tingpangatagak
sama sa itom nga mga bukton
nga nanagtuy-od aron mokab-ot
niadtong pikas nga bulan
nga nagkawing
sa sihag nga langit.

Ang daghang mga ligid
sa asuhong kagabhion
nagsigi sa kusog nilang pagtuyok
agi sa nag-alirong nga mga numero,
ug ang mga gutlo
mga kilab sa lagsik nga pagsaksak
sa mga baraha
nga giapod-apod
ngadto sa gipaningot
namong mga kamot.

Sa among pagpamauli
milusot kami
sa usa ka baga’ng gabon
nga nagkatay
daw usa ka gapas nga tunnel.
Ug unya sa among paglusad
ngadto sa luspad nga kabuntagon,
among gitanos
ang nagum-os namong mga sinina,
samtang ang ngamig namong mga kamot
mikuot sa among mga bulsa:
mihinol
kon unsa
ang nahibilin nilang mga sulod.

-- URIAS A. ALMAGRO

New Berlin, Wisconsin, USA