11.24.2008

alang kang lola salud
















Niabot si Lola sa among balay
tago sa kalibonan sa bukid sa Mayapay.
Nagbitbit siya'g lamian nga mga pagkaon
nga langyaw ang lami, lagmit gikan didto sa bitoon,
nagsakay sa awto nga giarkila didto sa syudad.
Iitsa-pwera niya palayo sa lamesa ang mga bulad.
Nasul-ob siya'g susama sa usa ka rayna.
Nagdahunog ang busina ni Lola.

Paghuman sa pagdawat sa among mga halok
ang iyang taas ug kulot nga buhok
iyang ipadunghay samtang kami nagtan-aw
sa iyang sapatos nga bangaw ang bulok.
Kuhaon niya ang kalo nga nagpurongpurong
sa iyang ulo ug maanyag nga nawong.
Ug mora siya'g gialirongan sa mga buwak
samtang siya dayon nanghinawak.
Unya giabrihan niya ang dala nga karton
nga mora og tubig nga gisulod sa laton,
gihinayhinayan kay basi'g mausik
susama sa umaabot nga taligsik.
Wa gyod mi manglihok kay mora kini og salag
sa langgam nga nagtuon paglupad, dali makay-ag.

Pagkatam-is sa iyang pahiyom, angay pagatam-ison,
wa'y kalainann sa Hamon Serano nga among gitulon.


-- MARIA VICTORIA BELTRAN
Cebu City, Philippines

No comments:


Daghang salamat sa mga maniniyot nga gapaambit sa ilang mga hulagway sa Google ug Flickr.