dramatic monologue sa usa ka magbabalak nga nagpiray-piray na duol sa lamesa diin nag-inom sab ang usa ka tropang koreana

You are very idle, my songs,
I fear you will come to a bad end.
-- Ezra Pound

Oo, tiguwang na ta. Oo, ikaw ug
ako. Tiguwang. Ikaw, karaang
sagabay nga haniti sa berso-berso,
nga nag-inusara sa imong pagtuo
nga dugokon kag babaye. Ikaw,
ug ako, ang maunongon mong
kaatbang sa tagay. Tiguwang na.

Oo, tiguwang na ta. Ang bulok
sa atong mga ngabil nahisama na
sa tungang gabii. Nga way bulan.
Way bituon. Gikan sa kolor-lumboy
ngadto sa ataon nga kangitngit.

Ug kamo! Kamong mga bigatlong
nag-agik-ik samtang naggitikanay,
kamong nagpakigol ug nagpaday-a
sa inyong mga paa nga morag
pinanitang balanghoy, kamong
tinubig ang paglaklak og Red Horse,
ako si Chiron, ang magtutudlong
centaur, nga andam mohatag
kaninyog katin-awan kabahin
sa sakit nga atay, sa kalambigitan
sa tamihid ug taytayan, sa huyad
sa bangaw, sa kitiw sa kometa,
sa imortalidad. Gani, andam kong
ipakita ninyo ang mapa sa nagliko-
likong dalan paingon sa himaya
nga napapas na gikan sa tanang
basahon sa kalibotan, nga dili ninyo
mabasa sa kalangitan, nga dili ninyo
mapalgan sa inyong pirated DVDs
kay ang kataposang kopya niini, ay!
nagtakoban sa usa ka sagradong
dapit—gitagoan kini isip ugat
nga nagbubod sa akong kinatawo
(nga molakra ug mahimong sayon
uyamot basahon kon inyong dalitan
og mapinanggaong paghapuhap).


-- VICENTE VIVENCIO BANDILLO
Dubai, United Arab Emirates