dili tanang hulagway naay dagway

Ang tanang panghitabo
napatik sa mga hulagway
dinhi sa akong gitipigan
nga karton nga adunay
kaliboan ka dagway--

kitang duha nga nagkatawa
sa atubangan sa mga giila
nga mga lugar sa tibuok
kalibotan sama sa
karaan nga mga simbahan
sa Europa ug India,
sa baybayon sa dagat
sa tibuok Pilipinas,
didto sa bukid sa Himalaya
ug sa mga palasyo
sa hari ug rayna nga
usab nipanaw na

apan kining tanan dili labaw

ug igo sa kamingaw--

kay samtang naglantaw ko

sa imong dagway
wala koy nakit-an

nga hulagway
susama kaniadtong

nanglabay nga mga oras

samtang kita nisubay
sa mga balas sa baybay.


-- MARIA VICTORIA BELTRAN
Cebu City, Philippines