tiritit sa maya

Ay, ay, tiririt sa maya, tiririt sa maya!
Ania na usab ang mga maya niining banika;
Nakighalog sa atong mga tipasi, Ligaya,
Oh, sila hagwaa, oh, sila gayod gitika!

Ang mga uhay nagalukdo nag mga bulawan,
Ang huyuhoy sa mga maya nakigduhawit;
Nagtinikling na man ang mga gutling mikawan,
Nagsaoysaoy na man ang salomang ginaawit.

Tala na, tadlas sa nagkiaykiay nga kahumayan,
Kay nagapanawag nang tulunggon sa hudyaka;
Ug ang honing misulbong himoon tang latayan
Paingon sa himaya diin adto ta mangyaka.

Ahay, gagming mga maya ngayang nanagpanon,
Nanuhiktuhik sa nagdupang tawo sa humayan;
Sayod kaha sa kahimungaya sa panahon,
Kay punting sa tirador ila mang malikayan.

Tuyo ba kaha nilang moambit sa gitagana?
Kadugtong god lang sila sa tinagoang katagbaw;
Pagtulon-an mang magpulos ang pagpanagana,
Ug sila amgid sa manimpalad, wa gyoy katalaw.

Pilahay ra ba kadtong panisok sa kalunhaw?
Karon, magliundok mang mga tipasi sa dapa;
Mga galab manghabas, mohingilin sa hulaw,
Ug mga buotang maya sa kawili maghapa.

Ania na usab ang mga maya niining banika,
Nakighalog sa atong mga tipasi, Ligaya;
Oh, sila hagwaa, oh, sila gayod gitika,
Ay, ay, tiririt sa maya, tiririt sa maya!!!


-- MELQUIADITO M. ALLEGO
Palm Harbor, Florida, USA