minos diyes para alas dose

Minos diyes para alas dose... minos diyes...
Ah, nagpatungod na usab ang impernohanong Adlaw
Ug kainit-- kainit baya!
Apan, kinsa ba uroy ang manumbaling
sa naglagiting udtong tutok niyang pagkahingkod?
Gawas kanako. Ug kanimo, kayha.

Sa mga higayong sama niini, ako magahilak. Oo.
Masud-ong ko man god ang mga basurahan
nga alirongan sa mga kabos. Mangutingkay,
mangalap og linabayng mga grasya
Kini palandonga.

Minos diyes para alas dose... minos diyes...
Managpasunding na usab ang mga talan-awon
nga makapakitbi kanako. Ug kanimo, kayha.
Lakat uban kanako, ug sa mga kinasang-an sa
dalan nga atong
pagalaktan, ipha ang mosugat nga mga
nagpanghuy-ab ug binukhad ang mga palad.

Gigutom, giuhaw akog tawhanong kaangayan.
Tala na paisanong Juan de la Cruz, palgon ta

ang kauhaw sa atong kagutom
ang kagutom sa atong kauhaw!
Minos diyes para alas dose... minos diyes...

-- MELQUIADITO M. ALLEGO
Palm Harbor, Florida, USA