Sanglit, way makapugong kanimo. Sayod ang tanan nga gikapoy ka na sa nahiagomang pagsalikway sa tawo.
Sanglit, sa gamay pa ko nasaag ko paingon nimo sa akong pagpanirador uban sa akong ig-agaw. Gibadlong ko niya kay ako kang giihian. Ingon niya, silotan ko sa mga dili-ingon-nato unya mapudpod ang akoa ug dili na magamit.
Sanglit, napamatud-an nga wa diay koy angayng kabalak-an.
Sanglit, matag higayon nga mouli ko motungas gyod ko ngadto nimo aron magpasalamat. Ug matag higayon mamatikdan ko nga adunay magbitayng mga gamut nga nangalawos, wa makatugkad sa yuta.
Sanglit, gusto unta nimo nga adunay mga tulisan nga magkampo ubos sa imong landong, gusto nimong makabati sa ilang laraw unsaon nila pagbanhig ang itumod nga ani ug unsaon nila pag-ihaw ang tikasan nga negosyante.
Sanglit, adto man sila magtapok sa sementeryo sa unahan.
Sanglit, gusto unta nimo nga adunay managhigugmaay nga mopasilong ubos sa imong landong, gusto nimong masinati ang tawhanong pagbati, ang dawiraw sa babayeng giwalis ang sayal ug gipaod nganha sa imong punoan, nag-utnga daw gilumsan, kabukogan misagunto sa rapido nga kablit ug pakang sa gugma.
Sanglit, ang kinaham sa mga managhigugmaay mao man ang kasagingan daplin sa sapa.
Busa, suyopa, dakit, ang akong ihi nga tugob sa sustansiya sa alak, babaye, awit. Pagpakabuhi pa. Kinsay nasayod, basig malamdagan ang umaabot nga kaliwatan ug ang nagbitay mong mga gamut mamulak og sinawng mga pusil nga gituparan sa nanaghiyodhiyod nga managhigugmaay, nanagkumbabit samtang ang ilang kalag misulbong sa langit.
Dili na ko makahulat sa imong kamatayon, pinangga kong dakit, ikaw kansang pagtinga molungtad og gatosan ka tuig.
-- VICENTE VIVENCIO BANDILLO
Dubai, United Arab Emirates
No comments:
Post a Comment