tuba ug tubig

Tuba, daghan gayong manginom kanimo
Buot managtagbaw sa ilang ginhawa
Bisag mga hugaw mingsagol nimo
Imnon ka gayod kay kuno makatagbaw ka

Lakip lagong, bakukang ug uban pa
Nangapakapa sa imong katam-is
Kaha sa katagbaw sila nangaluya
Nangamatay, kinabuhi nangahilis

Oh, tuba, tawo ka nga bahandianon
Tinamod ikaw, may kaalam o wala;
Butihon kon bungi, tinamod gihapon
Lahi sa tubig nga maoy timawa

Tubig, sa katin-aw mo lang, ikaw lingion
Sa kalubog mo ay, ikaw isalikway
Ilimnon kang labing mapainubsanon
Magpabiling mabugnaw sa kanunay

Tin-aw kon lubog, wala kay pagbukal
Iyabo sa yuta lang dayon suyopon
Wala kay bula kay dili ka mobukal
Lawog mong tanan sa yuta salaon

Apan, tuba, inanay sa imong pagbukal
May tubig pa baya nga labing matin-aw
Kanimo, palahubog day nagmahal
Ang tawo nga katumbas sa imong Kahugaw!


-- MELQUIADITO M. ALLEGO, M.D.
Palm Harbor, Florida, USA