pagpangita sa katapusang romantiko

Samtang nagbasa ko sa imong balak
wala nako tuyoa: Paghandom
sa lalaki nga nikagiw na.

Kadtong mohatag sa kataposan
nga lingkoranan. Mokapyot
sa trisikad aron lang
ang akong sampot mahimutang.

Kadtong mopadala sa sulat
nga tam-is og dila. Mokutlo
sa bitoon ug bulak sa
tangkong kay kanako ihalad.

Kadtong dili motawag kanako
og borikat. Mopalandong
sa hinungdan ngano nga
ako namaligya niining akong
biko nga giluwaan.


-- MARIA VICTORIA BELTRAN

Cebu City, Philippines