unsaon pagsakay og jeep

Gikan dinhis amoa
padulong sa Ayala
4C ang pangitaa
ug ang gwapa nga konduktora

ugaling moadto kas Colon
samtang ikaw nagtulon
sa mga abog nga asohon
paghulat sa 4B nga nagsagunson

apan kon sa bukid sa Busay
nahidlaw kas hanging haruhay
ug sa white wonder nga nagkiaykiay
ari sa tungod sa among balay pagsabay

ug ayaw gayud kalimti
ang sensilyo sa bulsa sa imong biste
kay ang drayber nga nagsubida
molugar, mokalit og para

kay kon wala gyod ka’y sensilyo
na ha, duna ra ba siya’y kutsilyo
ug bantay gyod kay siya baya gisapot
sa presyo's gasolina nga makapanuhot.


-- MARIA VICTORIA BELTRAN
Cebu City, Philippines