kahilom

Buang da tingali akong makigkabildo kanimo--
Kay bisag unsaon ko pagpalanog ang akong mga dalugdog
Dili man gayod ikaw mokihol:
Hinoon, saw-on mo man ang akong mga kilat ug liti
Ug itambog ngadto sa mga langob, pangpang ug bung-aw--
Unya, momando ka dayon ning akong kalibotang gihaya...

Niini, buot akong molugtab sa nagmulto mong pamayhon,
Buot kong lapason ang way-utlanan mong wanang,
Sukdon ang waykinutoban mong mga dupa ug hunat
Isaliyab ang dimatugkad ug waytimik mong paghabol
Ning akong yuta, dagat ug langit;
Ug ako mobahakhak, mopalanog sa mga budyong ug agong,
Mopabuto sa nagngulob kong mga bolkan,
Mopayhag sa mga langgam sa kabungtoran ug kapatagan--
Aron mabangkaw ko ang nagtaming mong panghinuktok
Diha sa kahapsay sa mga busay ug kangiob sa mga lugot;
Aron mahagit ko ang nanighawak mong kagabhion
Dinhi sa mga banika ug dakbayan ning akong kapuloan.

Apan, di ka gani manumbaling sa akong mga singgit--
Hinoon, mobanos ka inigtaliwan sa mga alingawngaw...
Ug kupogan ug lupogan mong mga lim-aw sa hilanat ning
Mga matang nagpangwilik sa tawhanong kapakyasan--
Hangtod nga mangalugti ug mangabugto kining kaugatan,
Mangapaas king tingog, magakaluya ang mga tinagubtob
Ning kasingkasing: Karon, moyukbo na ako kanimo!!!
O, hangtod ba unya sa timawa kong lubnganan
Ikaw mopiga kanako?

-- MELQUIADITO M. ALLEGO

Palm Harbor, Florida, USA