mata sa tiki

Dugay ko nang gihulat
ang imong gipadala nga sulat.

Dugay ko nang gidumdom
ang sakit mong pahinumdom.

Dugay ko nang gipakli
ang mga panid nga nangagisi.

Dugay ko nang gitagoan
ang mga panghitabong karaan.

Dugay ko nang gitulon
ang tambal nga pait ug tunokon.

Busa ayaw na dihag langaylangay
ipagawas ang imong hulagway
ug abriha na ang balay.

Dugay ko nang gilanlan
ang giluto mo nga mga sud-an.

Dugay ko nang gitan-aw
ang tumoy sa imong baraw.

Dugay ko nang nahinol
ang imong bus-ok nga bunol.

Dugay ko nang gisimhot
ang imong duga ug singot.

Dugay ko nang gipaminaw
ang nag-aso mong sabaw.

Busa, marika, intawon pagdali na,
Kay ngulngol na kining mata
sa tiki sa akong ilok namunga.


-- MARIA VICTORIA BELTRAN
Cebu City, Philippines