kuyaw malumos

Bersikulo bla-bla-bla-- basta,
bahin adtong paglakaw ni Hesus
ibabaw sa tubig. Katuohan-dili,
sama sa giingon sa mga sayantipiko
nga naa’y sibilisasyon sa Mars,
sama sa sex scandal starring Mahal.

Giingong henyo sa kalsada si Hesus.
apan dili kaha siya masaag sa nagsanga-
sangang kadalanan sa dakbayan:

Naa’y bigaong Junquera nga kanunay
diin naa’y nangagni’g singkwenta
dayo’g pakita sa iyang kigol
nga naglagom og bikangkang
sa iyang mga parokyano.

Naa sa’y Lorega diin kanunay
mahingos ang bato sa langit sa yuta.

Naa’y Mabolo nga lungga
sa mga Lupin. (Nakapalit gani ko’g
Freego shirt, 5o ra, bahong SM pa!)

Naa’y Pasil nga ang kalangsi
sa iyang pagkataw nangalisbo
bisa’g unsaon pa’g kaligo.

Basin unya’g molabang si Hesus
sa Tañon Street, magduhaduha,
kay basi’g maunlod tungod ba
kay daghang nagkumpayot niya.


-- JONA B. BERING
Tuburan, Cebu, Philippines