duha ka diyolen

Ako.
May duha ka diyolin.
Ako sa bata pa.
(10) Alang kanako gasa ni Papa
Gitago aron way mopasipala:
Sulod sa bulsang gama ni Mama
Nga gimahal ko sukad kaniadto.
Kausa giilog ni Bay Crisanto,
Abaga lagi niya nalisa...
Ako pa unta to siyang iitsa
Apan sa kaluoy gihatagan;
Mao kadtoy among handumanan
Sa gipakamutya kong diyolin
Sa mata sa panahong matulin (11)

Ako sa bayongbayong na
May duha ka diyolin.
Ako.
(9) Naaninaw ko sa mga mata
Sa trato kong labing guwapa:
Kausa nangabubho si Lara
Diyolin misiga, misidlak---
Nanluod ko, siya mihilak
Diyolin natagak, migilak (6)

Ako.
May duha ka diyolin.
Ako sa hamtong na karon.
(8) Nahikapan ko sa dughan
Sa akong asawang buotan:
Kausa si Dyunyor gigutom
Diyolin ko gipaum-om---
Ang kalami nagkasuhi
Sa panyawang kinabuhi (6)

Ako sa kangokango na unya.
May duha ka diyolin.
Ako.
(7) Kuhaon ko sa bulsa
Sa langit ihiusa:
Sa mga mata kaha
Ni Kristo mahaanha---
Tipigan sa Iyang dughan
Akong ludhan ug duphan?
Sa ako unyang kataposan
Gusto kag handomanan
Duaw sa akong lubnganan
Mao may akong ibilin
Duha ko ka Diyolin (11)

Ako.
May duha ka diyolin.
Diyolin nga Tawhanon (UG)
Diyolin nga Langitnon.

-- MELQUIADITO M. ALLEGO
Palm Harbor, Florida, USA