ang balak isip usa ka lusok nga nangka

Alang kanako ang balak mora pod
og usa ka lusok sa nangka.
Tam-is. Sinaw.
Bus-ok. Hanoy

nga mosulod
sa akong tilaok.
Walay sabod.

Apan ayaw lang hinumdumi
ang mga tagok
sa mga nangka nga giabis
ug gihimong utan
nga tinunoan.

Ayaw lang hunahunaa
kadtong imong nalimtan
og putos sa sako sa semento--
kadtong nangalata kay nasamdan

sa pagpaak sa mga piyangaw
ug mao nga ginuka ug

gikabahong ug gisulong

sa mga langaw ug nangahulog,

wala gani tagad mangahinog
tungod sa imong kadanghag.

Kalimti na lang kadto.

Ayaw gub-a ang imong adlaw.

-- RIC S. BASTASA

Katipunan, Zamboanga del Norte, Philippines