ang pagbiya

Milabay na usab
Ang lain pang panon
Sa nanglupad
Nga mga gangsa. Ang ilang porma
Sa letra’ng V nga milagbas
Sa abuhong kalangitan
Way nasayod kon unsa ang kahulogan.
Ang ngamig nga mga tudlo
Sa Oktubre’ng hangin
Mihikap kanako.
Ay, ang mga adlaw’ng nanglupad
Sama sa mga panon sa mga langgam!
Way makahawid
Kon panahon na sa pagtalikod.
Maski, ang pagdilaab
Sa bulawanong mga dahon
Ning tingpangatagak
Dili kawid-an.
Kay kining atong dapit,
Bisan unsa ang katahom,
Bisan unsa ang kabugnaw,
Sama man lang usab
Sa laing mga kalibotan
Nga usa lang ka hapitanan.


-- URIAS A. ALMAGRO
New Berlin, Wisconsin, USA