panaghimamat

samtang nag-atubangay ta,
naminaw ko nimo. ang akong kaugalingon
daw nahimong bantawan diin
ang imong mga pu'ng nagpatukar
sa orkestra sa akong kahimatngon.
gigakos sa akong pahiyom ang imong pahiyom.
gihagkan sa akong tutok ang imong tutok.
bisag naay lamesang nag-uwang nato,
nabatyagan kong nahiusa ang atong gininhawaan
ug ang hinagubtob sa atong kasingkasing.
taliwa natong duha, namatay ang takna.
ug sa dihang nilakaw na ta
sa managlahing padulngan,
wa lang ka masayod nga akong gihipos
ug gitipigan ang kagabhion
sa atong panaghimamat.


-- KEVIN A. LAGUNDA
Mandaue City, Cebu, Philippines