sa babayeng kuyog nako kagabii

Sa atong paglabang, hinayhinay
nga nilihok ang tuo kong kamot,
nangita sa wala nimong kamot.
Sa dihang nakuptan, nilugnot ka.
Wa tingali ka magkinahanglang naay

moagak nimo. Sa dihang nakatabok na ta,

wa ka makabantay sa kalit kong

pag-abay nimo. Apan wa'y tingog nimong

gipakanaog ang akong bukton gikan

sa imong abaga. Wa tingali ka

magkinahanglan nga kini habolan
batok sa nagtaligsik nga kagabhion.
Pagkataudtaod, nabantayan nako

nga ang imong tikang nagkakusog

hangtod nga nidagan ka. Nidagan sab ko

apas nimo. Layo na ka. Apan gibinat

sa mga suga sa da'n ang imong anino

ug mihawok sa akong tiilan, buot

unta nakong kuptan ug pugngan.

Apan nidagan sab ni gukod nimo.


-- KEVIN A. LAGUNDA
Mandaue City, Cebu, Philippines