kapikas

(alang sa akong musa, Maria Thelma)

Anghel nga mikunsad gikan sa langit
(Kopita sa init nga alak
Tig-iway sa mga dag-om sa kasakit
Sa gimingawng magbabalak).

Awit nga gisumaysumay sa kalag
(Bulak nga nangalimyon
Sangtuwaryo sa alibangbang nasaag
Matam-is nga pahiyom).

Dughang nagdagaang sa panagdait
(Hara sa panimalay
Sa pagmahal-pagpanggang way ikagsanglit
Sa damgong gigambalay).

Busay sa bugnaw, maaghop nga pagbati
(Ah, kundiman sa gugma:
Sa hulaw sa kinabuhi sinati
Mananoy nga saloma).

Manulondang tugob sa kahamilsing
(Obra-maestrang balak
Mag-aawit sa balitaw ning kasingkasing
Kanakong magbabalak.)

-- MELQUIADITO M. ALLEGO
Palm Harbor, Florida, USA

Hulagway: TITO ALQUIZOLA