mga nawong sa kangitngit

I.
Sulod sa daang simbahan,
Ilalom
Sa itom nga bronda,
Ang nawong sa tigulang nga babaye
Nagdungo.
Sa bukogon niyang kamot,
Hinayng nagtabyogtabyog
Ang gikuptan niyang rosaryohan.
Usa ka lugas, usa ka pag-ampo,
Usa ka nahibiling adlaw
Sa nagpid-okpid-ok niyang kinabuhi.
Apan ang mga lugas
Managsama
Ug di niya mahimong hibaw-an
Kon ang sunod nga lugas
Nga hinay niyang gihinol
Mao na ba
Ang kataposan.

II.
Ang tungang gabii nagpadulong
Ngadto niadtong samdong nga eskina
Diin ang usa ka tawo
Nagsandig niadtong sementong poste.
Nag-atang. Ang iyang nawong gisalipdan
Sa nagdayongyong niyang kalo.
Dili halayo, ang lapokong dalandalan
Mihiwa
Ngadto sa kinatung-an
Sa nanagsikit nga mga barongbarong,
Diin didto
Ang nagpid-okpid-ok nga kasiga
Sa gamayng lamparilya
Nagtukbiltukbil
Sa nawong sa usa ka babaye
Nga gitabonan
Sa mabaga’ng make-up.
Kadtong tawo, kadtong babaye
Pulos nanagdungo. Nagpaabot
Kon kanus-a ang kagabhion molingiw
Aron dili ihil-an
Ang ilang mga nawong.

III.
Dulom. Ang gabii
Ug ang lawod
Duha ka itom nga habol
Nga gibuklad
Sa naghuros nga kangitngit.
Ang tigulang nga mananagat,
Nga nagsul-ob sa daang takukong
Nagkadlit og posporo
Aron pagdagkot
Sa iyang daang hunsoy.
Kada kadlit, kada ohas,
Mga gutlo
Diin ang kagabhion
Nagpaabot
Niadtong daklit nga kahayag
Nga mopakita
Niadtong hingpit
Nga nag-inusarang nawong.


-- URIAS A. ALMAGRO
New Berlin, Wisconsin, USA