ang anak sa asindero

In the lost boyhood of Judas
Christ was betrayed.
--Æ

kay mao pay pagsugod og kaalegre
angay unta niyang ipahurot sa uban
ang tunga pa sa botelyang bino
siya nga adunay uwat sa simod

(nga agi sa tinahian sa iyang bungi
nga handomanan sa pagkatagak
gikan sa bintana dihang namoso
siya sa naligo nilang katabang)

apan unsa kahay nakaon sa karaho
nga kalit man lang niyang gipahipos
ang ilimnon kay matulog na kuno siya
pastilan kon buot baya hunahunaon

angay silang magsadya kay pauli na
gawas pa linaw ang ilang paglawig
ug lab-as ang huros sa huyuhoy
nga misaghid sa Dagat sa Kabisay-an

bisan tuod puroparehas ang barog
ug punto sa sinultihan nilang tanan
sa ngadto-ngadto maila nga lahi siya
sa uban nga mga peyon ra intawon

nga dili makasukol kon unsa man
ang kapritso sa higpit nga agalon
nga ilhon sa umaabot nga kaliwatan
nga usa ka mangtas nga manglulugos

-- VICENTE VIVENCIO BANDILLO

Dubai, United Arab Emirates