ang mga estatuwa sa carcar

Ang mga bato’ng estatuwa
Nga nanag-alirong
Niadtong gamayng rotunda
Sa Carcar
Dili sama kanato
Nga mohapit, unya mobiya.

Dili sila matandog
Sa abog ug sa kasaba
O ning kadyot tang
Mga paghunong.

Mao ray gibantayan
Sa batoon nilang pagtutok
Ang kilab sa mga lakang
Sa nagdali’ng mga adlaw.

Ang mga bato’ng estatuwa
Sa Carcar
Sama kanato
Nga nanagtindog
Ning utlanan
Sa kilomkilom
Ug banagbanag.

Hangtod karon
Ako naglibog
Kon hain ning kalibotan
Ang labing matuod,
Kini bang atoa
Sa abog ug kasaba
O kadto bang sa mga estatuwa
Nga hilom ug way paglihok.

-- URIAS A. ALMAGRO

New Berlin, Wisconsin, USA