ang balay diin ako nahimugso

(hubad sa ininglis ni John Naughton sa balak ni Yves Bonnefoy)

Nahigmata ako, mao kadto ang balay diin ako gihimugso,
Nagbuwa-buwa ang balod human mohapak sa mga bato,
Wala ni bisan usa ka langgam, bugtong hangin lamang
Alang sa pagbukas ug pinid sa mga balod,
Masimhot bisan didto sa kapunaw-punawan ang abo
Daw ang kabukiran adunay gitipigang kayo
Daw adunay nagsunog sa kawanangan
Ug ningadto kos beranda, andam na ang talad,
Ang tubig nihasmag sa tiilan sa talad, sa gamayng talad sa ngilit,
Ug siya nisulod, ang walay panagway,
Kadtong akong nahibaw-ang ni-uyog sa pultahan
Sa gawas, duol sa ngiob nga hagdanan, apan kawang lang,
Taas na kaayo ang saka sa tubig sa maong lawak,
Akong gikab-ot ang huptanan, gahing naliso ang huptanan,
Daw akong madungog ang kasaba sa pikas lapyahan,
Ang mga katawa sa mga bata nga nanagduwa sa kalibonan,
Ang duwa sa uban, kanunay lang ang kalipay, sa uban.


-- LEO BOB FLORES
Bukit Batok, Singapore