dagatnong panginabuhi

Gikan sa kalawran paingon sa puting lapyahan
Nianang halapad nga dagat sa kinabuhi
Mga mananagat nanagpanglumbay sa paglawig
Aron makigtigi sa natad sa pagpakabuhi
Aron palgon ang tipay sa tawhanong kalig-on.

Mihapdos nang galamhan sa tumang pakigbisog
Gumikan sa pagsugkay sa pinerlasang alon
Hinungdang napagba ang mga lawas tabunon
Mibigot ang mga higanteng dughang makugihon
Hain ang tiilan sa Bangaw sa mga paninguha?

Ilang nasinati ang tinapya-tapya sa pailob
Dili panumbalingon ang hampak sa mga unos
Kay mao may kinislap-kislap sa ilang Bitoon
Kayha, aron pagsuta sa kakantil sa tinguha
Nga sarang ikapasigarbo, sarang ikagtandi.

Inubanan sa nagkadaiyang hunat sa lambuyog
Birtud ginamugna alang sa hambon nga dagat
Pana, sapang, sahid, baroto kanunay inandam
Baling, pukot, surambaw, bungsod ginaugmad
Aron ibukot ug isalo sa umaabot kabulahanan

Ug ning ilang asinon ug hanginong kalibotan
Mahanggap ang lakad nga hapuhap sa kalinaw
Kay ila ang Dagat, mahagwa mang mga balod
Samtang may ginhawa, samtang may mga Layag
Pang mga Paraw ning Kinabuhi!


-- MELQUIADITO M. ALLEGO
Palm Harbor, Florida, USA