darohan

1. Pasunding--

Ang mga mumhong Uma nga kanhi giamoma sa mga Kabaw: Karon
gipanagdaro sa makamangong mga sagbot sa amorsikong Panahon--
Ang mga tunob sa mga ligid sa karomata inanay nga mosimang
Ngadto sa nagtipun-og nga mga bukog sa biniyaang lasang
Kay ang kanhing piit nga kabus-ok sa mga batong anapogon
Namungot na man og mga lumot sa laktod nga pagpasagad--
Nangyungyong na man ang mga buhok sa Uwatong Agtang.
Usa na ka hinikalimtang Baol ang ermitanyong Kinaiyahan...

2. Pangutana?

Hain nang kanhing kakugi sa kubalong napulo ka mga Tudlo?
Hain nang linaguto sa kusganong mga braso sa balsa?
Hain nang tigkinhas sa perlas sa Kinaiyanhong Hinguhaan?
Ang mamumugwal sa yuta mao bay talawan-taspokang umang
Nga mouk-ok sa budyong nga bayanan sa lakad nga pagtagam
Kon ang kinamalig ug dagaming Salirawan sa Brilyanteng Ani
Tamaktamakan sa naglumpat nga Upat ka Kabayong Katalagman?

3. Pagmata!

Sa gilawalawaang payag, sa gilawalawaang payag sa Banika
Anaa ang daghang mga ilagang nangitkit sa mga agungal--
Ang tigib nga mga ngipong nag-usap sa pabilo sa Pailob
Sa inanay mangapungil inigpanggilis sa mga Darong motabas--
Pukawa ang nahitagpilaw nga mga Kabaw sa lunangan: Sangoni
Sa tumbagang yugo sa bag-ong damgo, bag-ong kakugi
Bag-ong paglaom, bag-ong tingusbawan, bag-ong pagsagubang
Sa daghang mga pagsulay sa usa ka bag-o ug laing pagtudling...
Sa darohan sa kinabuhi!!


-- MELQUIADITO M. ALLEGO
Palm Harbor, Florida, USA