gikan didto sa sears tower

Nakutaw ang akong kuto-kuto
ug kalimutaw didto sa kinahabogang bahin

sa America. Lupig pa nako’y luwan

sa barko nga nalukapa sa pangpang
sa unos, gibagnos sa gabungtod
nga mga bawod. Sa akong pagtambo
tidlom sa kilumkilom, gihikyad
sa dakbayan sa Chicago ang lawod
sa mga dagitab. Ay, dili diay hinubog
ang pasiatab ni Carl Sandburg:
“Come and show me another city…
so proud to be alive.”

Apan ambot nganong kalit lang nalagpot
ang gilawmon sa akong panghupaw
ngadto sa bukid sa Busay. Didto diin
ang pusod sa kagabhion kanunay
sayon matultolan, labi na kon
tutokan ang parola sa Liloan.


-- MICHAEL U. OBENIETA
Topeka, Kansas, USA