mga papel nga ayroplano

Di ko na maihap
Kon pipila sa akong mga adlaw
Mga blanko’ng papel
Nga gipilopilo ug gihimo kong
Mga papel nga ayroplano.
Usag-usa ko silang gitugpo, gibuhian,
Daw mga puti’ng langgam
Nga nanglupad,
Way gihigot nga mga mensahe
Ug way paghambin nga mamalik.
Karon, nia pay usa
Nga akong gigunitan,
Maayong pagkapilo, way gum-os,
Bag-o sama sa paglaum.
Sud-ongon ko kini
Sa bugtong niyang paglupad,
Sa iyang pagsaka sa hangin,
Pagsarap, pagsulay og tuyok
Ug sa hinay niyang pagkapulak
Didto sa luyo
Sa mabaga’ng kadahonan–
Mahanaw kay way mangita.

-- URIAS A. ALMAGRO
New Berlin, Wisconsin, USA