tuway

(Hubad sa balak ni Mary Oliver)

Ang matag usa usa ka gamayng kinabuhi, apan usahay taas, kon ang
iyang lugar ning uniberso dili hitultolan. Sama kanato, duna silay usa
ka kasingkasing ug usa ka tungol; ilang ningbaw-an ang kagutom, ug
tingali ang dyutay usab nga pagkabusog. Ayaw silag tamaya sa ilang

pagkahuyang, kay duna silay braso nga mahigugmaon sa pagkabuhi.
Molikay sila sa kahayag. Mobitad ngadto sa ubos. Moggunit sila
pag-ipon sa ilang kaugalingon. Magdumili sila pag-ukab.

Apan usahay matangtang sila sa ilang lugar ug mahibutalid ngadto sa
lapyahan sa usa ka unos. Unya sila mohangos, mapuno sa balas, ug
wa silay laing mahimo gawas na lang sa pag-abli og labing dyutayng
liki. Unya ang kalayo sa kalibotan modapat kanila. Tingali, niadtong
mga adlawa, sila usab magsugod sa makapakitbing panglimbasog sa
paghunahuna, sa pagkahibulong kinsa, ug unsa, ug ngano. Kon
mahimong makalubong sila pag-usab sa kabalasan ila kining himoon.
Kon dili, siguro silang mangatigok, apan dili sa madali. Duna usab
silay mga kahinguhaan lagbas sa ilang kaunoran; maninguha usab
sila og labing kusog nga dili mamatay.

Gihubad ni:
-- URIAS A. ALMAGRO

New Berlin, Wisconsin, USA