tulo ka mga balak ni Anna Akhmatova

Mahitungod Sa Pagpamalak

Kana mao – ang mga bunot sa insomnia,
Kana mao – ang anuos sa balikog nga mga kandila,
Kana mao – ang unang bagting sa kabuntagon
Gikan sa ginatos ka mga puti’ng kampanaryo…
Kana mao – ang dagaanong tamboanan
Ilalom sa bulan sa Chernigov,
Kana mao – ang mga ligwan, kana mao-- ang clover nga maamyon,
Kana mao – ang abog, ug ang kasubo, ug ang alingiing nga kainit.

Sa Damgo

Ang itom ug timgas nga panagbulag
Giantos ko nga parehas kanimo.
Nganong naghilak ka man? Hinuon pakupti kanako ang imong kamot,
Isaad nga duawon mo pag-usab ang akong damgo.
Ikaw ug ako sama sa duha ka taas nga bukid
Nga di makairog ug magdinul-anay dinhi ning kalibotan.
Padad-i lang ako sa imong timbaya
Usahay inig-katungang gabii pinaagi sa mga bituon.

Tinagurha

Alang kanako, ang pagdayeg nga gikan sa uban-- mga abo,
Gikan kanimo, bisan ang pagsaway-- halangdon nga pagdayeg.


Gihubad ni:
-- URIAS A. ALMAGRO
New Berlin, Wisconsin, USA